Taliyihii ciidamada madaxtooyadda Puntland oo lagu dilay Gaalkacyo

GAALKACYO, Puntland - Taliyihii ciidamadda madaxtooyada Puntland, Cismaan Cumar Maxamed [Cismaan Itoobiyaan], ayaa ku dhintay iska hor-imaad ka dhacay magaalada Gaalkacyo, xarunta gobolka Mudug.

Is-rasaaseynta ayaa ka dhalatay howlgal ay ciidamadda ammaanka dowladda kula wareegeen xeradda Kabista halkaasoo kooxo hubeysan ay haysteen kuna iibin-jireen maandooriye uu Khamriga kamid yahay.

Maamulka gobolka iyo kan degmada oo sheegay in howlgalka lagu guuleystay ayaa xusay in ay gacanta kusoo dhigeen shan "maxaabiis" isla markaana mid kamid ah uu goobta ku dhaawacmay.

War-saxaafadeed nuqul kamid ah uu arkay Garowe Online kana soo baxay taliska booliska gobolka Mudug ee Puntland ayaa lagu soo dhaweeyay la wareegida xeradda Kabista.

"Waxayna sheegeen ciidanka howlaglka fuliyey maamulka gobolka iyo kan degmadaba in [xerada ay] ahayd saldhigga khamrada iyo maandooriyaha kale lagu kala iibsho, taas oo dhibaato amaan [ku haysey] magaalada Gaalkacyo," ayuu lagu yiri.

Khasaaraha dhimashadda iyo dhaawac ayaan wali si rasmi ah loo ogeyn, wallow la xaqiijiyey in ay jirto waxyeelo dhinacyadda dagaalamay soo gaarey.

Ma jiro wax war ah oo dowladdu kasoo saartey dhimashadda taliyaha oo goobta ku sugnaa inta uu howlgalku socday isla markaana ay haleeshay xabad isaga iyo darawalka gaarigiisa shaqsiga ah.

Alle ha u naxariistee, marxuum Cismaan oo haystay darajada Gaashaanle Sarre ayaa lagu waddaa in la aaso saacadaha soo aadan kana qeybgalaan duugtiisa mas'uuliyiin kala duwan.

Gaalkacyo waa magaalo ay dhanka waqooyi ka maamusho Puntland, halka dhanka koonfurna ay ka arimiso Galmudug. Muddooyinkii u dambeeyay ciidamada waxay kawada shaqeynayeen xasilinta xarunta gobolka.

GAROWE ONLINE