Wariye Deparani oo xiran maalintii 6-aad iyo baaqa saxaafadda oo socda
-
- Posted On 24-11-2015, 07:43AM
24 November, 2015(GO)-Waxaa maalintii lixaad xabsiga weyn ee magalada Garowe ku xiran Wariye Jamac Yusuf Deparani oo ka tirsan telefishinka Somali Channel qaybta Garowe.
Wariyahan oo ilaa hadda la caddayn sababta uu ku xiranyahay, ayaa waxaa soo baxaya baaqyo ay wadaan wariyaasha ku nool magalada Garowe, iyo guud ahaanba kuwa ka hawl galaya Somalia iyo caalamka kale.
Saxafiyiinta ayaa dowladda ka codsaday inay xorriyadiisa u celiso Deparani, waxayna ugu baaqday inay ilaaliso xuquuqda qofka iyo dastuurka dalka u dhigan.
Gudoomiyaha ururka Saxaafadda Puntland Faysal Khaliif Bare, ayaa mar kale cadeeyay inuusan wax dambi ah lahayn wariyaha xiran, wuxuuna laamaha garsoorka, hay'adaha caalamiga iyo dawladdaba ugu baaqay sii daynta Deparani oo tilmaamay inaan loo marin sifo sharciga waafaqsan.
Arrinta xariga Jamac, ayaa keentay in wariyaasha Garowe, ku muujiyaan qaab qoraal iyo hadal isugu jira sida uga xunyihiin in la xiro wariye aan galin dambi.
Wasiirka wasaaradda warfaafinta Puntland oo shalay 23 November, markii ugu horraysay ka hadlay xarriga Deparani, ayaa ku tilmaamay inuu dalka iyo dadkaba dambi ka galay.
Soocade, ayaa sidoo kale Jamac ku dhaliilay inuu yahay wariye aqoon u lahayn mihnadda saxafinimo.
Lama oga xilliga kiiska wariyahan la keeni doono maxkamadda, waloow la sheegay inu xabsiga ku sii jiri doono muddo 15 bari ah.
GAROWEONLINE
