Warsame: mushahar la'aan ayaa kamid ah arimaha aan isku casiley
-
- Posted On 13-06-2015, 10:59AM
June 13, 2015 (GO)- Wasiirkii hore ee Wasaaradda Cadaallada Puntland Ismaaciil Maxamed Warsame ayaa sheegay in sababaha uu isku casiley ay kamid tahay mushahar la'aan soo wajahdey shaqaalaha wasaaradda oo sida uu sheegay muddo siddeed bilood ah aan helin mushaharaadkii ay xaqa u lahaayeen.
"lix iyo toban bilood ayaan xilka haynay, dhaqaale xumo darteed lix iyo tobankaas bilood siddeed kamid ah , wax xuquuq ah iyo wax mushaharaad ah kama helin dowladda" ayuu yiri.
Ismaaciil Maxamed Warsame ayaa sidoo kale sheegay in khilaafka soo kala dhex galay isaga iyo Madaxweyne Gaas arrimaha uu ka bilowday ay kamid tahay mushahar la'aanta shaqaalaha iyo sida dowladdu isaga xil sari la'dahay.
"mar walba waxan u doodi jirney in shaqaalaha xuquuqdooda helaan, waxyaabaha keenay khilaafka aniga iyo Madaxweynaha ayey kamid ahayd"
Shaqaalaha dowladda ee mushaharaadku ka maqan yihiin ayaa ka walaacsan isku-shaandheynta la filayo in lagu sameeyo Golaha Wasiirrada, maadaama isbeddelka dhacayaa sababi doono in bixinta mushaharaadku raagto bilaha qaarna ay waayaan.
GAROWE ONLINE
