Xiisad ka taagan degmada Dhahar
-
- Posted On 26-09-2014, 07:46AM
Sept 26, 2014 (GO)- Xiisad ayaa ka taagan degmada Dhahar ee xarunta gobolka Haylaan oo ay maanta ka dhacday doorashada guddoomiyaha golaha deegaanku.
Duqa cusub ee degmada Dhahar waxaa loo doortay Mustafe Axmed Aadan Geesood, waxaa sidoo kale ku xigeenka loo doortay Xuseen Kutaambe.
Iska hor imaad khasaare geystey oo dhex maray dhinacyo kala taabacsan labada maamul ee Puntland iyo Somaliland ayaa xalay degmada Dhahar ka dhacay.
Sida ay wararku nagu soo gaarayaan wuxuu dagaalkaasi bilowday kaddib markii lagu murmay dhismaha golaha deegaanka Dhahar oo maalmihii u dambeeyey Wasaaradda Arimaha Gudaha Puntland ku howlanayd.
Hal qof ayaa dagaalka xalay dhacay ku geeriyoodey kaasoo ka tirsnaa dhanka qolyaha taabacsan Somaliland, waxaa sidoo kale ku dhaawacmay labo qof oo kale.
Wararku waxay intaas ku darayaan in ciidamo ka tirsan kuwo Somaliland oo kasoo baxay degmada Burco iyo deegaano kale oo hoos tagaa ay Dhahar kusoo wajahan yihiin.
Wixii kasoo kordha xaaladda degmada Dhahar wararkeena dambe ayaad kaga bogan doontaan.
GAROWE ONLINE.
