Xildhibaan dhawaan ku geeriyooday Garowe oo aas-qaran loo sameeyay
-
- Posted On 23-11-2016, 11:14PM
GAROWE, Puntland- Mudane kamid ahaa Xildhibaanada Aqalka hoose Barlamanka Federaalka Somalia, oo dhawaan ku geeriyooday caasumadda Puntland, ayaa maanta loo sameeyay aas-qaran, waxaaana lagu aasay Garowe.
Duugta oo ka dhacday dhinaca Waqooyi ee magaalada, ayaa waxa ka qayb galay madaxda Puntland, Madaxweynihii hore Puntland, XildhibaanO katirsan Barlamanka Somalia, kuwa golaha shacabka Puntland, Wasiirro, guddiga doorashooyinka dadban, mas'uuliyiin iyo dadweyne kale.
Labo rakcadood oo saaladda Jaanasada ah, ayaa marxuumka lagu tukaday, waxaana ALLE loo weydiiyay inuu u dambi dhaafo.
Madaxdii aas-ka ka qayb gashay, ayaa dirtay tacsi tiiraanyo leh, waxayna EEBBE uga baryeen inuu jannadii Fardowso ka waraabiyo, ehelka iyo umadda uu ka baxayna samir iimaan ka siiyo.
"Inaalilaahi wa inaa illayhi raajucuun waxaan halka isugu nimi aaska marxuun Daahir Xaaji Geelle oo runtii ahaa xildhibaan Dawladda fadaraalka u meteli jirey Puntland in mudo ah aadna loo yaqaaney wanaagiisa, anaguna si dhaw ayaanu isugu dhoweyn oo aanu saaxiib u ahayn, wuxuu ahaa wasiir kamida golahaygii xukuumadda markii aan ahaa Ra'iisul wasaaraha Soomaliya, Illaahay ha'u naxariisto illahay meel uga wanaagsan ifka hageeyo, waxaana Illahay uga rajaynaynaa in uu udenbi dhaafo una naxariisto, sigaara waxaan ugu tacsiyadaynayaa qoyskii iyo qaraabadii uu ka tegey iyo dhamaan u mada soomaaliyeed gaar ahaan Puntland,'' Ayuu yiri madaxweynaha Dawladda Puntland Cabdiweli Maxamed Cali Gaas.
Marxuum Xildhibaan Daahir Xaaji Geelle, ayaa dhawaan kusoo baxay doorasho ka dhacday magaalada Garowe, wuxuuna soo noqday Xildhibaan Federaalka ah doorashadan ka hor.
GAROWEONLNE
