5 qof oo ku dhintay qarax ka dhacay Muqdishu
-
- Posted On 05-04-2017, 12:33PM
MUQDISHU, Somalia- Qarax xooggan ayaa maanta ka dhacay magaalada Muqdishu gaar ahaa maqaayad ku taalla nawaaxiga wasaaradda Dhalinyarada iyo cayaaraha dowladda Somalia.
Weerarka oo loo adeegsaday gaariga lagusoo xiray walxaha qarxa ayaa lala beegsaday meherad ay ku sugnaayeen dad shacab ah.
Inta la xaqiijiyay shan qof ayaa geeriyootay, waxaana dhaawacu kor u dhaafayaa sideed ruux.
Ciidamada ammaanka dowladda Federaalka Somalia, ayaa gaaray goobta qaraxu ka dhacay, waxayna sameeyeen baaritaano kala duwan, halka baabuurta gurmad ay qaadayeen dhaawacyada iyo dadka geeriyooday.
Majirto wax war ah oo ilaa hadda kasoo baxay dhinaca dowladda Somalia.
Goobta la weeraray oo lagu magacaabo Italian ayaa inta badan waxaa ku dhow xarumo dowladeed gaar ahaan wasaaradaha amniga iyo Cayaaraha.
Ururka Al Shabaab ayaa loo malaynayaa inay ka dambeeyeen falkan oo kamid noqonaya weeraro muddooyinkii dambe ka dhacay caasumadda Somalia.
GAROWEONLINE
