Villa Somalia oo shaacinaysa jadwalka doorashada federaalka ee 2027, iyadoo aan heshiis siyaasadeed laga gaarin

Muqdisho — Villa Somalia ayaa la filayaa inay berri shaaciso habraacyada iyo jadwalka doorashada federaalka ee 2027, iyadoo aan weli heshiis siyaasadeed laga gaarin hannaanka doorashada, waxaana qorshahan loo arkaa mid ay dowladda federaalku keligeed waddo.

Xasan Sheekh Maxamuud, Madaxweynaha mudo-xileedkiisu dhamaadey, ayaa shalay kulan la yeeshay guddiga doorashooyinka ee soo qabanqaabiyay doorashooyinka Koonfur Galbeed, Galmudug iyo Hirshabeelle, iyadoo la sheegay in kulanka lagu isla qaatay jadwalka iyo habraacyada doorashada ee la qorsheynayo in berri la shaaciyo.

Sida ay wararku sheegayaan, jadwalka la diyaariyay ayaa dhigaya in doorashada federaalka lagu qabto muddo 180 maalmood ah, laga bilaabo 15-ka Oktoobar 2026 ilaa 12-ka Abriil 2027. Qorshahan ayaa sidoo kale dhigaya in muddo bil ah la siiyo ururrada siyaasadeed ee doonaya inay isdiiwaangeliyaan.

Ku dhawaaqista la filayo ayaa imanaysa xilli uu weli taagan yahay khilaafka u dhexeeya Villa Somalia iyo mucaaradka, kuwaas oo dalbanaya in heshiis siyaasadeed laga gaaro hannaanka doorashada iyo qaabka loo maareynayo kala-guurka siyaasadeed ee dalka.

Mucaaradka ayaa ku adkeysanaya in doorashada federaalka aan lagu go’aamin karin qorshe hal dhinac ah, balse loo baahan yahay wadatashi iyo heshiis ay qayb ka yihiin dhinacyada siyaasadeed ee dalka. Ilaa hadda, ma jiro heshiis loo dhan yahay oo laga gaaray hannaanka doorashada soo socota.

Villa Somalia ayaa dhankeeda wada dadaallo ay ku dooneyso in lagu sii ambaqaado nidaamka qof iyo cod, iyadoo taageero ka raadinaysa dhinacyo gudaha iyo dibadda ah. Waxaa sidoo kale socda wada-hadallo lala leeyahay dhinacyo kala duwan oo taageersan hannaankaas, inkastoo khilaafka siyaasadeed uusan weli xal helin.

Xasan Sheekh ayaa kulankii shalay ku ammaanay guddiga doorashooyinka shaqadii ay ka soo qabteen dowlad-goboleedyada Koonfur Galbeed, Galmudug iyo Hirshabeelle, isaga oo muujiyay inuu doonayo in la sii wado hannaanka ay halkaas ka hirgeliyeen.

Wararka laga helayo kulanka ayaa sheegaya in madaxweynuhu ku adkeystay in qorshaha doorashada la sii ambaqaado, isla markaana aan la hor istaagi karin.

Si kastaba, tallaabada la filayo ee Villa Somalia ay ku shaacinayso jadwalka doorashada ma xallinayso khilaafka siyaasadeed ee jira, maadaama aan weli la isku raacin qaabka doorashada federaalka, cidda maamuleysa iyo habka lagu xaqiijinayo in geeddi-socodku helo taageero siyaasadeed oo ballaaran.

Shaacinta jadwalka ayaa sidaas darteed noqon karta tallaabo cusub oo sii adkeyn karta loollanka siyaasadeed, haddii aan laga gaarin heshiis ay ku wada qanacsan yihiin dowladda federaalka iyo mucaaradka.

GAROWE ONLINE