Baaritaan: Khasaaraha Shacabka duqeymaha Mareykanka ee Soomaaliya oo kordhay

MUQDISHO — Ugu yaraan 216 qof oo rayid ah ayaa lagu dilay ama lagu dhaawacay duqeymo iyo howlgallo cirka ah oo uu Mareykanku ka fuliyey Soomaaliya intii u dhexeysay 2007 iyo May 2025, sida lagu sheegay baaritaan cusub oo lagu saleeyay xog ay ururisay hay’adda Airwars.

Baaritaanka waxaa daabacday Arab Reporters for Investigative Journalism (ARIJ), waxaana lagu eegay 884 howlgal oo cirka ah oo ay Mareykanka iyo xulafadiisu ka fuliyeen Soomaaliya, Suuriya, Ciraaq iyo Yemen.

Cilmi-baarayaashu waxay diiwaangeliyeen ugu yaraan 3,336 qof oo rayid ah oo lagu dilay ama lagu dhaawacay howlgallada cirka ee afarta dal. Soomaaliya waxaa laga diiwaangeliyey 216 qof, halka Suuriya ay lahayd tirada ugu badan oo gaareysa 1,336 qof.

Yemen ayaa lagu diiwaangeliyey 991 qof, halka Ciraaq ay gaartay 793 qof oo rayid ah oo lagu dilay ama lagu dhaawacay howlgallada la baaray.

Xogta ayaa daboolaysa muddo ku dhow 18 sano oo Mareykanku uu Soomaaliya ka waday duqeymo cirka ah, kuwaas oo inta badan lagu bartilmaameedsaday kooxda Al-Shabaab. Howlgallada ayaa sii xoogeysanayay sannadihii dambe, iyadoo Mareykanku uu sheegay inay qeyb ka yihiin dadaallada lagu wiiqayo awoodda kooxda iyo lagu taageerayo ciidamada dowladda Soomaaliya.

Si kastaba, baaritaanka ayaa diiradda saaraya khasaaraha soo gaaray dadka rayidka ah, iyadoo Airwars ay muddo dheer ururinaysay xog ku saabsan weerarrada cirka iyo saameynta ay ku yeeshaan dadka aan dagaalka ku jirin.

Tirada 216-ka qof ayaa ka tarjumaysa kiisaska ay cilmi-baarayaashu awoodeen inay diiwaangeliyaan, sidaas darteedna ma cadda inay tahay tirada guud ee khasaaraha rayidka ah ee ka dhashay dhammaan duqeymaha Mareykanka ee Soomaaliya muddadaas.

Baaritaanka ayaa sidoo kale muujinaya baaxadda khasaaraha rayidka ah ee laga diiwaangeliyey howlgallada cirka ee Mareykanka iyo xulafadiisa ee Soomaaliya, Suuriya, Ciraaq iyo Yemen. Afarta dal waxaa lagu diiwaangeliyey in ka badan 3,300 khasaaro oo rayid ah intii lagu jiray muddada baaritaanka.

Duqeymaha Mareykanka ee Soomaaliya ayaa noqday arrin si weyn loo hadal hayo, gaar ahaan marka laga hadlayo isla xisaabtanka, ilaalinta dadka rayidka ah iyo sida loo xaqiijiyo khasaaraha ka dhasha weerarrada cirka.

GAROWE ONLINE