Al Shabaab laga saarey deegaano cusub

JOWHAR, Soomaaliya - Ciidamada dowladda Federaalka Soomaaliya ayaa Al Shabaab kala wareegay dhowr deegaan oo ku yaalla gobollada Shabeellooyinka, kadib howlgal ay fuliyeen 48-kii saac ee lasoo dhaafay.

Taliska Ciidamada ayaa xaqiijiyay in ay ka saareen Al Shabaab Tuulooyinka Basra, Buulo-Kuuto, Daniga Baalow iyo Jabaluul oo kawada tirsan labadaasi gobol, iyadoo aan dhicin wax dagaal ah maadaama Al Shabaab isaga carareen.

Wararka ayaa sheegaya in ciidamada dowladda ay wadaan dhaq-dhaqaaqyo ciidan oo ku aadan sidii Al Shabaab looga saari lahaa goobaha ay kaga harsan yihiin labadan gobolka, oo mudo ku sugnaayeen.

Tani ayaa imaanaysa xili dowladda Federaalka ay qorsheynayso guluf dagaal oo ka dhan ah Al Shabaab, iyadoo taageero ka raadisay dowladaha deriska ah, sida Uganda, Jabuuti iyo Itoobiya oo horey ciidamo uga joogeen dalka.

Madaxweyne Farmaajo ayaa ku dhawaaqay in dowladiisa qaadayso weerar loogu aar-gudayay qaraxii Al Shabaab 14-kii Oct ka fuliyeen Isgoyska Zoobe ee magaalada Muqdisho, kaasi oo ay ku dhinteen ku dhawaad 400 qof.

AMISOM ayaa isku diyaarinaysa inay ka baxdo dalka 2018-ka, iyadoo uu jiro guluf colaadeed oo ka dhan ah Al Shabaab. Halkan ka akhriso.

GAROWE ONLINE