Al Shabaab oo weerar ku qaaday Fariisinka AMISOM ee Biya Cadde
-
- Posted On 13-06-2017, 12:58PM
BIYA CADDE, Somalia – Malleeshiyaad katirsan kooxda Al Shabaab, ayaa weerar culus ku qaadey Saldhigga Ciidamada Midowga Africa ee AMISOM ku leeyihiin Deegaanka Biya Cadde, ee gobolka Shabeellaha Dhexe.
Dadka Deegaanka ayaa sheegay in Weerarka uu ku billowday Duqeyn Madaafiic ah, oo mudo 20 Daqiiqo ah Al shabaab ku garaacaysay Saldhiga Ciidanka AMISOM, kahor inta aysan fooda is-darin Labada dhinac.
Dhawaqa Madaafiicda iyo Rasaasta, ayaa laga maqlay inta badan Tuulooyinka ku dhaw Deegaanka Biya-cadde, waxaana la sheegay inuu dagaalka ka dhashay Khasaaro, inkastoo aan la ogeyn tirada rasmiga ah.
Dadka degaanka ayaa waxay kaloo sheegeen in xalay Saqdii dhexe ay kusoo baraarugeen daryanka Madaafiicda ku dhaceysa nawaaxiga Saldhiga AMISOM iyo qeybo kamid ah Tuuladooda.
Ciidamada AMISOM wali war kama soo saarin weerarka xalay lagu qaaday Saldhigooda.
Kooxdan ayaa kordhisay mudooyinkii dambe Weerarada ay ku qaadayso fariisimada Ciidamada dowladda Federaalka Somalia, kuwa Maamul Goboleedyada, iyo sidoo kale AMISOM.
GAROWEONLINE
