Askar ku dhimatay qarax ka dhacay Buurhakabo
-
- Posted On 23-01-2017, 01:37PM
BUURHAKABO, Somalia- Ugu yaraan 5 Askari oo katirsanaa ciidanka dowladda Somalia ayaa ku geeriyootay qarax ka dhacay degmada Buurhakabo.
Qaraxa oo ahaa mid loo adeegsaday miino ayaa waxa uu ka dhacay saldhig ciidamada ay ku leeyihiin gudaha degmada, xilli hore oo maanta ah.
Sida uu Goobjooge uu xaqiijiyay GO, lix askari oo kale ayaa dhaawacyo culus kasoo gaarey weerarka, kaasi oo mas'uuliyadiisa sheegatay Kooxda Al shabaab.
Weerarka ayaa ahaa mid xooggan, oo dhawaqiisa saakay laga maqlay xaafadaha degmada Buurhakabo, waxaana la sheegay inuu waxyeello gaariiyay dad shacab ah.
Wararka intaas ku daraya in Ciidamadu sameeyeen howlgal ay kusoo xireen tiro dad shacab ah, oo ay uga shakiyeen inay ku lug leeyihiin Qaraxa.
Degmada Buurhakabo ee gobolka Baay waxaa mudooyinkii dambe ka dhacay qaraxyo dhulka lagu aasay, oo qaar kamid ah lagu dilay Gudoomiyihii degmada iyo ku xigeenkiisa.
GAROWEONLINE
