Askari shan shilin Somali kun qof u dilay oo la xukumay  

Abuubakar iyo dadka degmadiisa Xamar Weyne oo aanan wax adeeg la taaban karo ka helin dowladda hoose.

MUQDISHO, Soomaaliya - Askari ka tirsan ciidanka dowladda hoose ee Muqdisho oo maalintii Talaadada qof rayid ah ku diley degmada Xamar Weyne ee Muqdisho sabab la xiriirta shan kun shilin oo canshuur ah ayaa lagu xukumay dil toogasho ah shan maalmood kadib markii uu dilka dhacay.

Abuubakar Maxamed Nuuraani oo 65 jir ahaa, kana mid ahaa dadka degaanka Xamar weyna ayuu askari dowladda ka tirsan ku diley gurigiisa hortiisa, halkaas oo uu ku haystay ganacsi aad u yar kadib markii, sida la sheegay, ay ku murmeen lacag shan kun ah oo canshuur ah.

Abuubakar iyo dadka degmadiisa Xamar Weyne oo aanan wax adeeg la taaban karo ka helin dowladda hoose, ayaa haddane ku qasban in ay bixiyaan canshuurta, taasi oo marar badan si awood sheegasho ah looga qaado, illaa heer hadda ay dil marayso.

Maxkamadda Ciidanka oo qaati taagan

Inkasta oo si degdeg ah loo xukumay askariga, lagana yaabo in si dhaqso ah loo fuliyo xukunka, ayaa haddane waxaa jira culeys iyo cabasho ay sheeganayaan garsooreyaasha maxkamadda ciidanka.

Col Shuute oo ah guddoomiyaha maxkamadda ciidanka oo maalmo ka hor ka hadlayay shirkii garsoorka ee Muqdisho lagu qabtay ayaa xusay in sanadkii hore ay dil ku xukumeen wax ka badan boqol qof, balse dadka lagu fuliyay xukunkaasi ay aad u yaryihiin.

Wuxuu sababta ku sheegay in beelaha ay ka kala dhasheen labada qof ay diyo kala qaataan, kuna heshiiyaan bannaanka, iyaga oo xukunka maxkamadda u isticmaala in ay ku bisleystaan diyada qofka.

Madaxweyne Xasan Sheekh Maxamuud oo meel fagaaro ah kala hadlay dadweyne tiro badan ayaa isaga ballan-qaaday in askari kasta oo dil gaysta la marinayo waxa ay diinta iyo xeerarka dalka ka qabaan, isaga oo si gaar ah u sheegey in ninkii lagu diley Xamar Weyne caddaaladda si degdeg ah loo marsiin doono.

GAROWE ONLINE