Axmed Madoobe oo la kulmay wakiilada Beesha Caalamka
-
WARIYAHA KISMAAYO GAROWE ONLINE
- Posted On 23-02-2021, 01:13PM
KISMAAYO, Jubaland - Ergayga gaarka ah ee Qaramada Midoobay u qaabilsan Soomaaliya, James Swan iyo wafdi uu horkacayo ayaa maanta gaarey caasimada KMG Jubaland ee Kismaayo.
Diblumaasiga Ameerikaanka ah waxaa wehliyey safiiro ay kamid yihiin; Wakiilka Midowga Yurub ee Soomaaliya Nicolás Berlanga Martínez iyo Safiirka Talyaaniga.
Sidda laga soo xigtay Madaxtooyadda Jubaland, fadhigaan gaarka ah waxaa diiradda lagu saarey xaaladda uu haatan waddanka wajahayo iyo khilaafka doorashooyinka.
"Madaxweynaha Dowlada Jubaland Mudane Axmed Maxamed Islaam ayaa Xarunta Madaxtooyada ku qaabilay wafdi heer caalami ah oo uu hogaaminayay Wakiilka gaarka ah ee Qaramada Midoobay u qaabilsan Soomaaliya Mr. James Swan, waxaa kale oo wafdigan kamid ahaa Wakiilka Midowga Yurub ee Soomaaliya Nicolás Berlanga Martínez iyo Safiirka Talyaaniga," ayaa lagu yiri qoraalka.
Bayaanka ayaa la raaciyey: "Masuuliyiintan ayaa yeeshay kulamo miro dhal ah iyadoo sidoo kale hab maqal Iyo muuqaal ah ay kaga qeyb galeen Safiirka Maraykanka u qaabilsan Soomaaliya Ambassador Yamamoto iyo Wakiilka Midowga Afrika Danjire Francisco Caetano Madeira".
"Kulamadan ayaa diirada lagu saaray xaaladahii u danbeeyay ee Soomaaliya iyo arrimaha Doorashooyinka," ayaa lagu soo gabagabeeyay war-saxaafadeedka.
Jubaland ayaa dhowaan soo bandhigtay shan qodob oo ay sheegtay in ay kaga qeybgaleyso wadahadal kale oo laga galo khilaafka doorashooyinka kana mid tahay dhexdhexaadinta Caalamka.
GAROWE ONLINE
