Axmed Madoobe oo saaxiibo ay kala irdhoobeen xilal u dhiibay

Magacaabidan ayaa kusoo beegmaysa xilli Jubaland ay isku-diyaarineyso guluf ka dhan ah Al-Shabaab.

KISMAAYO, Jubaland - Markii magaalada Kismaayo la qabanayay sanadkii 2012-kii, waxaa lagu qabtay saf balaaran oo isugu jira ciidamada Raaskaanbooni oo uu hoggaaminayay Axmed Madoobe, ciidamadii militariga ee xeryaha Kenya lagu tababaray ee taabacsanaa Prof Gaandi iyo ciidamada Kenya.

Kadib hardan dhanka hoggaanka ah, waxa ay guusha raacday Axmed Madoobe oo noqday hoggaamiyaha Jubbaland, waxaana meesha ka baxay hoggaamiyeyaashii halgankii dheeraa iyo dagaalka usoo galay Kismaayo.

Waxaa ka mid ah taliyihii ciidanka militariga ee qeybta ka ahaa qabashadii Kismaayo iyo deegaanada kale Jeneraal Ismaaciil Saxardiid, iyo sarkaal sare Cabdullaahi Qaldaan, kuwaas oo inkasta oo ay xilal ka qabteen Jubbaland-ta Axmed Madoobe, haddane aanan ku waarin xilalkaasi, muddo dheerna banaan joog ahaa.

Maalinkii Isniintii ayuu Axmed Madoobe digreetooyin is dabajoog ah taliyaha ciidanka daraawiishta Jubbaland ugu magacaabay Jeneraal Ismaaciil Saxardiid, halka Cabdullaahi Qaldaan u magacaabay taliyaha booliiska.

Axmed Madoobe ayaa sidoo kale isbadel ku sameeyay maamulka gobolka Jubbada Hoose oo uu ka qaaday Cabdirishiid Gooni oo muddo gooni-u-socod ka ahaa maamulka, iyo sidoo kale degmada Kismaayo oo uu xilkii ka qaaday guddoomiye ku xigeenkii mudada dheeraa Cabdirishiid Maduuloow. Waxa uu sidoo kale isbadel ku sameeyay hay’adda qaxootiga iyo barokacayaasha.

Axmed ayaa la sheegay in isbadelan u sameeyay in uu dheelitir u sameeyo dhanka awood qeybsiga beelaha xilli la wajahayo dagaal ka dhan ah Alshabaab.

Waxaa sidoo kale la filayaa in uu isku shaandheyn ku sameeyo golihiisa wasiirada oo ay ka maqanyihiin xubno muhiim ah oo qaarkood loo doortay xildhibaano federal, noqdayna wasiiro federal ah. Xilalka banaan waxaa ka mid ah wasiirka arrimaha gudaha oo uu ka dhintay Jeneraal Maxamed Warsame Darwiish.

GAROWE ONLINE