Baydhabo: Shirka Guddiga farsamada doorashada bilowday

BAYDHABO, Koonfur Galbeed - Guddiga farsamadda xalinta khilaafka doorashooyinka Soomaaliya ayaa Isiinta maanta ah waxay ka dageen caasimadda ku meelgaarka Koonfur Galbeed Baydhabo.

Shirka guddigan ka kooban 14-ka xubnood oo si rasmi ah uga bilowday xarunta gobolka Baay ayaa diiradda lagu saarayaa sidii looga gudbi lahaa caqabadaha ku geedaaman coddeynta heer federaal.

Dowladda federaalka ah ee Soomaaliya, maamulada shanta ee xubinta ka ah iyo gobolka Banaadir ayaa min laba xubnood ku leh guddigan oo warbixin kusoo celin doona hogaamiyeyaasha maamuladda.

Ma cadda mudada rasmi ahaan uu qaadan doono shirka guddiga farsamadda. Balse, waxaa la filayaa in shirarkooda ay noqon doonan kuwa ku kooban todobaadkan isla markaana xal kama dambeys keena.

Warar lagu kalsoon yahay ayaa xaqiijinaya in wakiiladda Beesha Caalamka ay dusha sarre kala socon doonan wadahadaladda guddiga farsamadda ayaga oo faragelinaya xilli kasta oo is-mari-waayaan.

Diblumaasiyiinta ayaa shirarkan lagu xalinayo khilaafka doorashooyinka u bedelay heer guddiyo farsamo ka gedaal markii madaxda sarre ay is-faham buuxa ay gaari waayeen.

Qodobadda lagu waddo in ay ku jeex-jeexaan shirarkooda waxay kala yihiinl qadiyada gobolka Gedo, xulista wakiilada maamulka Somaliland, iyo guddiyadda maamula doorashooyinka labada heer.

GAROWE ONLINE