Cabdisaciid oo telefoonka kula hadlay saraakiil Mareykan ah

Wadaxaajoodyadan ayaa kusoo aadaya xilli ay Washington ay dhowaan ku hanjabtey xayiraadyo.

MUQDISHO, Soomaaliya - Wasiirka Arrimaha Dibadda iyo Iskaashiga Caalamiga ah, Cabdisaciid Muuse Cali, ayaa khadka telefoonka wada hadal kula yeeshay Kaaliyaha Xoghayaha Arrimaha Dibadda Mareykanka u qaabilsan Afrika, Molly Phee.

Sida laga soo xigtay wasaaradda arrimaha dibadda Soomaaliya, waxaa wadahadalka ku wehliyey Ergayga Gaarka ah ee Dowladda Maraykanka u qaabbilsan Geeska Afrika, David Satterfield.

Wada hadalka Masuuliyiinta ayaa "diiradda lagu saaray kor u qaadidda xiriirka labo geesoodka ah ee Soomaaliya iyo Maraykanka ee dhinacyada iskaashiga amniga, dhaqaalaha, horumarinta iyo arrimaha Gobolka Geeska Afrika".

Bayaanka wasaaradda oo lagu shaaciyey ciwaanka Facebook-ga ayaa lagu yiri "Wasiir Cabdisaciid Muuse Cali wuxuu uga mahad celiyey dowladda Mareykanka taageerada ay u fidiso dowladda Soomaaliya".

Warar madax-banaan ayaa tibaaxaya in dhinacyadda ay isla soo qaadeen fariimihii ugu dambeeyay ee Washington kasoo saartey xaalada Soomaaliya si gaar ah doorashooyinka sida weyn u daahay.

"Wakiiladda Mareykanka waxay adkeeyeen sida ay uga go'an tahay dhaqan-gelinta hanjabaadahooda haddii aan loo hogaansamin heshiisyadii u dambeeyay ee doorashooyinka," ayay sheegeen illo madax-banaan.

Wadaxaajoodkan ayaa kusoo beegmaya xilli xukuumadda Washington ay dhowaan laba jeer ku goodisay in ay xayiraadyo dhanka socdaalka ah kusoo rogi doono Soomaaliya haddii dib-u-dhac kale uu ku yimaado jadwalka doorashooyinka heer federaal.

GAROWE ONLINE