Ciidamo taabacsan Ahlu Sunna oo la wareegay Matabaan

BELEDWAYNE, HirShabelle – Cutubyo kamid ah askartii Ahlu Sunna ee lagu biiriyey ciidamadda xoogga qeybta Galmudug ayaa waxay maanta la wareegeen gacan-ku-hayanta qaybo kamid ah degmadda Matabaan ee gobolka Hiiraan, sidda ay xaqiijiyeen dadka degaanka saraakiil.

Sidda ay muujinayaan warbixinadda, ciidamadda oo hoostagayey qeybta 21aad ee xoogga dalka ayaa qabsaday saldhiga, kontaroolka laga galo magaaladda iyo xarunta maamulka degmadda.

Ma cadda sababta dhabta ah ee keentay talaabadan. Balse, waxay kusoo hagaageysaa xilli maalmihii lasoo dhaafay ay taagneyd xiisad ku saabsan lacagta laga uruuriyo kontaroolka oo ku dhici jirtay gacanta ciidamadda taabacsan dowlad goboleedka Galmudug.

"Waxaa loo maleynayaa in ciidamadda u jaranjeera Ahlu Sunna ay ka gadoodsan yihiin dhaqaalaha oo ay la wareegtay Madaxtooyadda Galmudug halkii ay ahayd in dib loogu celiyo degmadda," ayuu yiri wariye madax-banaan oo telefoonka kula hadlay warsidaha Garowe Online.

Mas'uuliyiinta ammaanka Galmudug iyo Wasaaradda Amniga dowlad goboleedka ayaa ka gaabsaday in ay ka hadlaan arrinkan.

Hogaanka Ahlu Sunna ayaa haatan dibad-joog ka ah siyaasadda Galmudug ka gedaal markii looga adkaadey loolankii doorashooyinka oo Villa Soomaaliya ay kusoo saartay Villa Soomaaliya.

Dhaqdhaqaaqa ay sameeyeen ciidamadda taabacsan ururkan ayaa sidoo kale wuxuu kusoo aadayaa xilli xaaladda nabad-gelyadda maamulkan ay ka jirto habacsanaan badan isla markaana maalmihii lasoo dhaafay ay Al-Shabaab halkaas ka fulisay weeraro khasaaro sababay.

GAROWE ONLINE