Dad ku dhintay Dagaal ka dhacay Cadalle
-
- Posted On 25-02-2017, 09:58AM
CADALLE, Somalia- Ugu yaraan 5 ruux ayaa ku dhimatay dagaal beeleed ka qarxay duleedka degmada Cadalle ee gobolka Shabeellaha dhexe, oo gacanta ku hayo maamulka Hir-Shabelle.
Mas'uul katirsan maamulka maamulka fadhigiisu yahay Jowhar, ayaa GO u xaqiijiyey dagaalka iyo Khasaaraha, isagoo sheegay in colaadda ay tahay mid soo cusboonaatay, oo salka ku haysa aanooyin qabiil iyo dilal horey u dhacay.
Wuxu sheegay in Labo malleeshiyo beeleed oo deegaanka ah ay ku dagaalamayaan Tuulooyin hoostaga degmada Cadalle, iyadoo labada dhinac ay helayaan gurmadyo kala duwan oo xoojisay dagaalka.
Madaxda Maamulka Hir-Shabelle ayaa ku baaqay in si deg deg ah loo joojiyo dagaal beeleedka dhiiga shacabka lagu daadinayo, islamarkaana lagu xaliyo khilaafka wada-hadal.
Wararka ayaa intaas ku daraya in Odayaasha deegaanka ay ku wahan yihiin goobaha iska hor imaadku ka dhacay, si ay u qabooyiyaan xiisadaha, xabad-joojina ukala dhigaan labada beelood ee colaadda sokeeye u dhaxayso.
Sidoo kale, dagaal kaas lamid ah ayaa shalay ka dhacay magaalada Marka, ee xarunta gobolka Shabeellaha hoose, waxaana ku dhimatay ugu yaraan 2 qof oo shacab ah.
GAROWEONLINE
