Dad ku nafwaayey qarax ka dhacay magaaladda Beledwayne

MUQDISHO, Soomaaliya - Shan ayaa lagu dilay, todoba waa dhaawac qarax miino oo ka dhacay albaabka garoon kubada cagta oo ku yaala magaaladda Beledwayne, gobolka Hiiraan ee bartamaha Soomaaliya.

Qalcadda Laqanyo ayaa xilliga uu falkaas dhacayey waxaa ka socotay cayaar kubada cagta oo qeyb ka ah tartan loo qabtay naadiadda kala duwan ee ka dhisan magaaladaas.

Saraakiisha ammaanka HirShabelle ayaa dhacdadaas ku eedeeyay Al-Shabaab oo joogitaan badan ku leh degaanada hoos-yimaada gobolka isla markaana dhowr jeer ka fulisay ficilo amni darro.

Muuqaalo lagu faafiyey baraha bulshadda oo qaarkood uu arkay GO ayaa muujinaya in markii qaraxu dhacay ay dadweynaha kala carareen isla markaana uu hakad ku yimid kulankii socday.

Xalay ayay ahayd markii Al-Shabaab ay caasimada HirShabelle ee Jowhar ay ku dishay wasiirkii Beeraha ahaana mudane ka tirsan baarlamaanka maamulkaas, Cabduqaadir Abuukar Maxamuud.

Beledwayne oo uu webiga Shabeelle u kala qeybiyo Galbeed iyo Koonfur ayaa 210 KM dhanka waqooyi ka xigtaa caasimada Soomaaliya ee Muqdisho oo qaraxyadu ku badan yihiin mudooyinkii dambe.

Inta la xaqiijiyey 17 ruux ayaa ku geeriyootay, in ka badan 20 kalana waa ay ku waxyeeloobeen weerar toos ah iyo ismiidaamin Isniintii ay Al-Shabaab ku ekeysay Elite Hotel oo ku yaala xeebta Liido ee Muqdisho.

GAROWE ONLINE