Dagaal ka qarxay bariga gobolka Mudug

GAALKACYO, Soomaaliya - Dagaal qaraar oo u dhaxeeya Labo malleeshiyo beeleed ayaa saaka dib uga qarxay deegaano ku yaalla duleedka magaalada Gaalkacyo, ee xarunta gobolka Mudug.

Wararka naga soo gaaraya gobolka ayaa waxay sheega in colaadda socota ay u dhaxayso labo beelood oo kasoo jeeda maamullada Puntland iyo Galmudug, kuwaasi oo mudooyinkii isku gayay bariga gobolka.

Dagaalkan ayaa ka bilowday aroortii hore ee saaka Abaare 05:00-AM deegaanka Godad, waxaana dadka degaanka ay ku soo tooseen rasaas socota, taasi oo ay isku waydaarsanayeen labada dhinac.

Inta la xaqiijiyay lix ruux oo shacab ku jiraan ayaa ku dhaawacmay dagaalka socda, kuwaasi oo la dhigay Isbitaallo ku yaalla Koonfurta iyo Waqooyiga Gaalkacyo.

Dadka deegaanka ayaa kusoo waramaya in dagaalka uu sii xoogeysanayo, islamarkaana labada dhinacna ay soo gaarayaan gurmadyo hor leh.

Puntland iyo Galmudug oo horey dhowr saxiixday heshiis nabadeed oo fashilmay, ayaan wali ka hadlin colaadda kasoo cusboonaatay bariga gobolka Mudug.

GAROWE ONLINE