Diblomaasiyiinta Qunsuliyadda Somalia ee Jeddah oo Muqdisho looga yaarey

MUQDISHO, Somalia - Xukuumadda Federaalka ah ee Somalia ayaa u yeertay diblomaasiyiinta ka howlgalaya Qunsuliyadda magaaladda Jeddah, ee dalka Sacuudiga.

Qoraal uu ku saxiixan yahay Saciid Xaaji Maxamuud, oo ku magacaaban Xoghayaha ee Wasaaradda Arrimaha Dibadda ayaa lagu wargeliyay dhamaan diblomaasiyiinta iyo ku-qeybsanayaasha Qunsuliyadda in mudo 30 cisho ah ku yimaadaan Muqdisho.

Amarkan ayaa la ogeysiiyay Madaxweyne Farmaajo iyo Ra'iisul Wasaare Khayre, iyadoo aan warqadda lagu sheegin sababta loogu yeeray mas'uuliyiinta Qunsuliyadda Somalia ee Jeddah.

Go'aankan ayaa imaanaya xilli Soomaali badan ay ku dhibaateysan yihiin Sacuudiga, kuwaasoo aan ka helin Qunsuliyadda adeegyada ay uga baahan yihiin, maadaama ay ku nool yihiin dal shisheeye oo caqabado badan kala kulmaan.

GAROWE ONLINE