Doorashada Aqalka Hoose Banaadiriga oo Ka Socota Muqdishu
-
- Posted On 17-01-2017, 01:16PM
MUQDISHU, Somalia- Waxaa maanta Muqdishu lagu dooranayaa Labo xubnood oo ka harsanaa Kuraasta Beelaha Banaadiriga ee Aqalka hoose, kuwaasi oo 5 kamid ah la doortay Bishii December, ee sanadkii 2016-ka.
Labada Kursiga ayaa mid kamid ah waxaa si gaar ah ugu tartamaya Haweenka Beelahaasi, iyadoo mid kalena ay u taagan yihiin murashaxiin rag ah, oo gaaraya saddex kuwaasi oo Siyaasadda kuwada cusub.
Kursiga Koowaad waxaa ku tartamaya laba haween ah oo kala ah;
Biibi khaliif Maxamed.
Qamar Islow Nuur.
Kursiga Labaadna waxaa ku tartamaya Saddex qof oo kala ah;
Caamir Axmed Maxamed.
Lutfi Shariif Maxamed.
Shariif Maxamed Cali.
Doorashada waxay ka dhacaysaa xarunta Gaadiidka Booliska ee magaalada Muqdishu.
Labada aqal ee Baarlamaanka cusub ayaan wali la dhamaystirin xubnihiisa, iyadoo ay jiraan 5 kursi kale oo lagu muransan yahay kuwaasi oo Madasha ay ku baaqeen in dib loo soo doorto.
Xildhibaanoo isugu jiro Labada aqal oo ka kooban 285 mudane ayaa dhawaan lagu dhaariyay Muqdishu, waxaana kuwa aqalka hoose todobaadkii tagey doorteen Gudoomiye iyo ku xigeenadiisa.
GAROWEONLINE
