Doorashada Kursi kamid ah BFS oo ka dhacaysa Jowhar
-
Wariyaha Muqdisho Garowe Online
- Posted On 28-01-2018, 10:18AM
MUQDISHO, Soomaaliya - Waxaa maanta lagu wadaa in magaalada Jowhar, ee xarunta KMG ee maamulka HirShabeelle ay ka dhacdo doorashada Kursi kamid ah Gollaha Shacabka ee Baarlamaanka Soomaaliya.
Gudiga Madaxa-banaan ee Doorashooyinka Qaran Soomaaliya ayaa xaqiijiyay in Kursiga Beesha Xawaadle ay u tartamayaan Lix musharax oo kale ah Cabdullaahi Maxamed Cali Sanbaloolshe, Cali Cabdullaahi Cosoble, Dahir Cabdulle Cawaale, Nuur Iidow Beyle, Dahabo Xasan Axmed iyo Xuseen Axmed Geelle.
Musharxiinta Sanbaloolshe, Taliyihii Nabad Sugida Soomaaliya [NISA] iyo Madaxweynihii hore ee maamulka HirShabeelle, Cali Cabdullaahi Cosoble ayaa ugu cad-cad doorashada Kursigan Gollaha Shacabka ee loo qoondeey Jufada Cali Madaxweyne.
Kursigan waxaa markii hore baneeyay Sanbaloolshe bishii April, 2017 markii loo magacaabay Taliyaha Nabad Sugida, xilkaasi oo laga qaadey kadib qaraxii Zoobe.
Amaanka magaalada Jowhar ayaa si aad ah loo adkeeyay saaka, iyadoo ay ergada doorashada ay ku sugan yihiin hoolka doorashada, oo ah halkii lagu soo doortey Xildhibaanada HirShabeelle.
GAROWE OLINE
