Dowladda oo sheegtay in howlgal lagu dilay 30 ka tirsan AS

Weerarkan ayaa ka dhacay deegaanka Jilib Marka ee ku yaala gobolka Shabeellaha Hoose.

Marka, Soomaaliya - Ciidamada dowladda Soomaaliya ayaa maanta howlgal qorsheysan waxa ay ka fuliyeen deegaanka Jilib Marka ee ku yaala gobolka Shabeellaha Hoose ee maamulka Koonfur Galbeed.

Ciidanka Xoogga dalka ayaa beegsaday goobo ay isku uruursanayeen xubno ka tirsan kooxda “AS”, waxaana la gaarsiiyey khasaare xooggan, sida lagu sheegay warbaahinta dowladda.

Saraakiisha ciidamada ayaa sidoo kale sheegay in howlgalka lagu dilay in ka badan 30 maleeshiyaad ah oo ay ku jiraan horjoogayaal ka tirsan kooxda, waxaana sidoo kale lagu soo qabtay gaadiid dagaal.

Ciidamada dowladda ayaa wali sii wada weerarada ay ku qaadayaan fariisimaha AS ay ku leeyihiin deegaano ka tirsan Maamulada Koonfur Galbeed iyo Jubbaland.

Waxaa la filayaa in labadan maamul uu ka dhaco wajigii labaad ee howlgallada ciidan ee ka dhanka ah AS, ka dib marka uu dhamaado wajiga koowaad.

GAROWE ONLINE