Qarax culus oo ka dhacay Muqdisho iyo wararkii ugu dambeeyay

MUQDISHO, Soomaaliya - Qarax xoog leh ayaa goordhaw laga maqlay magaaladda Muqdisho, ee caasimadda Soomaaliya xilli wadooyinka ay ku dibadbaxayaan arday ka caraysan Imtixaanka la baabi'iyay.

Goobjooge la hadlay Warsidaha Garowe Online ayaa sheegay in qaraxa oo ahaa mid loo adeegsaday gaari walxaha qarxa lagu soo xiray oo ka dhacay xarunta degmada Wardhigleey, oo ku dhaw Villa Somalia.

Jugta qaraxa ayaa laga maqlay qeybo badan oo kamida Caasimadda, iyadoo cirka isku shareeray qiiq iyo uur madow, waxaana soconaya rasaas xoogan, oo ay ridayaan ciidamada ilaalada xarunta degmada.

Qaraxan ayaa qeyb ka ah falal amni darro oo ka dhacaya Muqdisho, oo ah xarunta ay degan tahay dowladda Federaalka, sidoo kalena ay ku sugan yihiin ciidamo ajnabi ah oo xafiisyada madaxda sare ilaalinaya.

Lama oga illa hadda khasaaraha ka dhashay weerarka, balse gaadiidka gurmadka ayaa goobta gaarey oo u daabulaya dhaawacyada Isbitaallada Muqdisho.

GAROWE ONLINE