Garoonka Muqdisho oo lagu qabtey Ajnabi wata Boorsooyin laga shakiyay

MUQDISHO, Somalia - Ciidamada amniga Garoonka diyaaradaha ee Muqdisho ayaa gacanta ku dhigay Nin Ajnabi ah oo wata boorsooyin laga shakiyay, waxaana warar kala duwan ay kasoo baxaayaan dalka uu u dhashay ninkaan.

Warar Warsidaha Garowe Online uu helayo Saraakiil katirsan Laanta Socdaalka ayaa sheegay in ciidanka booliisku ay ku joojiyeen ruuxan kadib markii ay ka shakiyeen seddex shandad, xilli uu ka gudbayay qeybta baarista.

Waxa uu ku qornaa diyaaradda Eithiopian airlines duhurnimadii maanta ka duuleysay Garoonka, balse laga celiyay duulimaadkiisa, waxaana lagu wareejiyay ciidamada Nabad Sugida, oo baaritaan ku haya kiiskiisa.

Illo ku dhaw NISA ayaa GO u sheegay in boorsooyinka ay ku jiraan qasacado ay ka buuxaan sunta dadka ka ilmeysiisa [Tear Gas], waxaana ninka wata wax laga waydiinayaan halka uu ka keenay alaabtan, meesha uu u waday iyo cid iska leh.

Warar is-khilaafsan ayaa kasoo baxaya dhalashadda ninkaan, waxaa lagu tilmaamay inuu midkooda kasoo jeedo South Africa ama Mareykanka, laakiin waxaa laga war sugayaa Nabad Sugida inay fahfaahiso magaciisa iyo jinsiyadiisa.

GAROWE ONLINE