Habraaca doorashada kuraasta Somaliland oo la faafiyey

Cabdi Xaashi iyo Mahdi Guuleed ayaa si wadaji ah u soo saarey habraacan aadka loo sugaayey.

MUQDISHO, Soomaaliya - Cabdi Xaashi iyo Mahdi Guuleed ayaa si wadajir ah u soo saarey habraaca doorashada xubnaha Aqalka Sare ku metelaya gobolada waqooyi, sida ku xusan qoraalkan uu faafiyey Guddiga Doorashooyinka ee Heer Federal ee 2020-2021.

Guddoomiyaha Aqalka Sare baarlamaanka federaalka ah ee Soomaaliya iyo ra'iisul wasaare ku xigeenka xukuumadda xilgaarsiinta ayaa horey ugu heshiiyey in ay si wadajir ah u wada maamulaan geedi-socodka doorashooyinka kuraasta Somaliland.

Labada dhinac ayaa "si buuxda ugu heshiiyay in la soo afjaro khilaafkii u dhaxeeyay, in la mideeyo guddoonka iyo xubnaha guddiga maamulka doorashooyinka heer Somaliland, in la soo gabagabeeyo is-kooxeysigii iyo abaabulkii u dhaxeeyay siyaasiyiinta iyo in sida ugu dhaqsiyaha badan loo gudagalo hirginta doorashada kuraasta labada aqal ee ka soo jeeda Somaliland".

Mucaaradka ayaa si weyn u soo dhaweeyay heshiiskaas. Ra'iisul wasaaraha xilgaarsiinta Rooble wuxuu ku tartarsiiyey in ay si deg-deg ah u guda galaan sidii dhameystiri lahaa geedi-socodkan.

Xubnaha Somaliland ku metela baarlamaanka federaalka ayaa aalaaba waxaa lagu doortaa magaalada caasimada ah ee Muqdisho maadaama aysan tagi karin degaanadooda.

Somaliland ayaa tan iyo 1991-dii waxay sheegataa in ay ka madax-banaan tahay dowlada federaalka ah balse waxay dunida u aqoonsan tahay maamul hoostaga xukuumada Muqdisho.

Qadiyadda kuraasta Somaliland ayaa kamid ahayd arrimaha is-mari-waaga ugu culus uu ka jiray guud ahaan doorashooyinka dib-u-dhaca weyn uu ku yimid ee Soomaaliya taasoo qorshuhu ahaa in ay dhacdo dhamaadka sanadkii hore 2020 illaa horaanta 2021.

Hoos ka akhriso qoraalka habraaca

GAROWE ONLINE