Hadaladii horey looga faafiyey ciidanka lagu tababaray Eritrea
-
WARIYAHA MUQDISHO GAROWE ONLINE
- Posted On 21-12-2022, 04:49PM
MUQDISHO, Soomaaliya - Qeybtii ugu horeysay ee ciidamadda Soomaaliya loogu tababaray Eritrea ayaa Arbacada maanta ah kasoo degay Muqdisho, sidda ay sheegtay dowladda federaalka ah.
Wasiirka gaashaandhiga Cabdiqaadir Maxamed Nuur oo la hadlay warbaahinta ayaa daaha ka rogay in askartan ay "dhiig cusub" ku shubi doonan dagaalanka ka dhanka ah maleyshiyada Al-Shabaab.
Balse, Mr Nuur ma uusan shaacin tirada askarta soo laabatay, halka la dejiyay iyo goobta ay rasmi ahaan ku biiri doonan howlgaladda ka soconaya qaybo kamid ah waddanka.
Soo laabashadda ciidamadan ayaa meesha ka saareysa tuhun iyo warar kala duwan oo ay horey uga faafiyeen siyaasiyiin kuwaasoo qaarkood ay haatan xilal sar-sarre ka hayaan dowladda dhexe.
June 10, 2021
Madaxwayne Xasan Sheekh Maxamuud ayaa yiri: "Dhalinyarada Eritrea loo xaabiyey waa la qaldey; waa la iibsadey. Aksum ayey ka dagaalameen, Makala lagu laayey".
January 18, 2021
Gaasimaha NISA, Mahad Maxamed Salaad ayaa yiri: "Waa arrin aad u foolxun, murugo iyo uurkutaalana ku beertay ehelada caruurtooda lagu xasuuqay dagaalka Itoobiya ka holcaya".
January 18, 2021
Wasiirka arrimaha gudaha, Axmed Macalin Fiqi, ayaa yiri: "Waalidiinta waxaa loo sheegay in caruurtooda loo qaadey Eritrea ay ka dagaalameen Itoobiya halkaasna ay tirro badan ku dhinteen".
December 9, 2021
Ergayga abaaraha, Cabdiraxmaan Cabdishakuur Warsame, ayaa yiri: "[Dhalinyaradda loo qaadey Eritrea] iyagoo ajnabi u diriraya ayey dhinteen, halka kuwa kale ay ciqaab, cudur iyo gaajo dishay".
Soo celinta ciidamadda ayaa sidoo kale waxay kusoo hagaagaysaa maalin kadib markii garoonka diyaaradaha Aadan Cadde ay ka dhooftey diyaarad ay saarnaayeen boqolaal dhalinyarro ah.
Dowladda federaalka ayaan wali fahfaahin ka bixin dhalinyaradaas. Wararku waxay xusayaan in ay tababar u aadeen dalka dibadiisa. Tafaasiisha horudhac ah waxay xusayaan in loo diray dalka Eritrea.
GAROWE ONLINE
