Ingiriiska oo lacag ku goobaya Soomaali ku eedeysan dilka 47-jir
-
WARIYAHA LONDON GAROWE ONLINE
- Posted On 02-01-2020, 12:12PM
LONDON, UK – Booliska Ingiriiska ayaa abaalmarin lacageed u balanqaadey ciddii keenta xog lagu soo qaban karo nin Soomaali ah oo loo haysto dilka 47-sano jir.
Cabdi Cali, oo 29-sano jir ah, ayaa madaxiisa la dul-dhigay aduun dhan lix kun oo Doolar, sidda ay qortay saxaafadda maxaliga ah ee Britain.
Eedeysanaha ayaa loo haystaa khaarijinta Shaun Lyall, kaasoo bishii July ee sanadkii hore lagu weeraray hoygiisa Cleethorpes.
Warbixin kasoo baxday bileyska oo loo qeybiyey saxaafadda ayaa Cabdi ku tilmaamtay "shaqsiga tuhunka ugu badan ee uu saaran yahay".
Maxkamad ayaa kiiskan horey waxay xabsi daa'in ugu xukuntay Craig Whittle, oo 45-sano jir ah markii lagu helay in uu kaalin ka qaatay weerarka.
Craig Whittle, oo sanadkii ugu horeeyay xabsi ku qaatay, ayaa waxaa lagu waramayaa in ay saaxiibo dhow ahaayeen Cabdi Cali.
Tan iyo markii uu dilku dhacay, Cabdi waa baxsad, walina lama ogga goobta saxda ah ee uu ku dhuumaaleysano, wallow la xaqiijiyey in uusan ka bixin Ingiriiska.
GAROWE ONLINE
