Jubaland oo si kulul uga hadashay xaaladda Muqdisho

KISMAAYO, Jubaland - Maamulka Jubaland oo qoraal adag kasoo saarey dhacdooyinkii ugu dambeeyay ee Muqdisho ayaa eedeymo kala dul-dhacay dowlada federaalka ee waqtiga ka dhamaadey.

War-saxaafadeedka oo kasoo baxay xafiiska warfaafinta madaxweyne Axmed Maxamed Islaam ayaa lagu cambaareeyay talaabada ay ciidamada loogu adeegsaday shacabka banaanbaxayey.

Sidda ku xusan bayaanka, Jubaland ayaa "nasiib darro" weyn waxay u aragtaa in ciidamadii loogu talagalay in ay la dagaalamaan Al-Shabaab iyo "cadowga lagu waxyeeleeyo dad shacab ah".

"Awood sheegashadan aanan waafaqsaneyn dastuurka ee la isticmaalay xalay iyo saaka waxay xagal daacineysaa dedaaladii loogu jiray in xal laga gaadho xasaradaha siyaasadeed ee dalka," ayaa lagu yiri qoraalka.

Jubaland ayaa xustey in weerarkii dowladda ku qaadey Hotel Maa'ida iyo banaanbaxayaasha ay horkacayeen ay lamid tahay "falalka gurracan oo ay ka sameysay gobolka Gedo".

"Dowladda Jubaland waxay ugu baaqeysaa mas'uuliyiinta dalka in ay ilaaliyaan xuquuqda dastuuriga ah ee muwaadiniinta Soomaaliyeed isla markaana ka fogaadaan falalkaas foosha xun," ayay xustey.

Ugu dambeyntii, Jubaland ayaa ku baaqdey in si deg-deg ah xal siyaasadeed looga gaaro mar-xaladda uu waddanka ku jiro haatan iyo kala aragti duwanaanta ka jirta dhanka doorashooyinka 2020-21.

Hoos ka akhriso qoraalka

GAROWE ONLINE