Jubbaland: Safarka Khayre waa jawi abuuris, ma jiro wadahadal

KISMAAYO, Jubbaland - Maamul goboleedka Jubbaland ayaa ku adkeysanaya in uu wali taagan yahay khilaafka u dhaxeeya qaar kamid ah maamuladda dalka iyo dowladda dhexe ee Soomaaliya.

Is-mari-waagaasi ayaa salka ku haya arrimo dhowr ah sida; amaanka, dhisitaanka ciidamo qaran iyo wadaagista kheyraadka.

Xirsi Jaamac Gaani, wasiiru dowlaha Madaxtooyada Jubbaland, oo muujiyay in aanu marnaba is-dhiibi doonin maamulkiisa, ayaa tilmaamay in xalinta murankaasi looga fadhiyo dowlada dhexe.

"Dowlada Federaalka, iyadda ayaa looga fadhiyaa qaabkii loo xasilin lahaa dalka…u kalsooni gelin lahayd maamuladda iyo xalinta khilaafka wadanka regaadiyay," ayuu yiri wasiiru dowlaha.

Hadalkaan kasoo yeeray wasiiru dowladaha ayaa imaanaya iyadda oo uu maanta gaarey magaaladda Kismaayo Ra’iisul wasaaraha dalka, Xasan Cali Khayre.

Khayre ayaa lagu wadaa in uu kulamo la yeesho madaxwayne Axmed Madoobe si loo xaliyo khilaaf-yada wali jira.

Hasayeeshee, wasiiru dowlaha ayaa meesha ka saarey inuu jiro wadaxaajoodyo gaar ah oo ay haatan kula jiraan dowladda dhexe, oo dhiirageliyay safarka Khayre.

"Waxa loo balansan yahay kaliya waa jawi abuuris ee ma jiraan wadahadal aan haatan la gelayno dowladda," ayuu hadalkiisu daba dhigay wasiiru dowlaha madaxtooyadda Jubbaland.

Arrimaha kale oo ay isku hayaan Villa Somalia iyo maamulka Kismaayo ayaa waxaa kamid ah doorashadda, taasoo Axmed Madoobe uu doonayo inuu kusoo laabto kursiga iyadoo Dowladda Dhexe diyaarinayso musharixiintii la tartami lahaa.

GAROWE ONLINE