Koonfur Galbeed oo burburisay wadahadalkII DF iyo maamuladda

MUQDISHO, Soomaaliya - Maamulka Koonfur Galbeed, ayaa sabab u noqday burburka shir mudooyinkii dambe laga shaqeynayay, oo la filayay inay isagu yimaadaan madaxda Dowladda Federaalka iyo maamulada dalka.

Guddiyo ka kala socda labada dhinac ayaa ku howlanaa qaban-qaabadda shirka, oo madaxda ku yeelan rabeen khadka Internet-ka [Virtual conference], waxaana fashilkiisa dusha loo saarey Koonfur Galbeed.

Shirarka guddiyada farsamo, ayaa natiijo la’aan ku dhamaadey, waxaana la isku afgaran waayay goorta la qabanayo shirka, kaasoo xafiiska UN-ka ee Soomaaliya [UNSOM], uu gadaal ka raaxiyay qabashadiisa.

Puntland ayaa soo jeedisay in shirka uu dhaco 20-ka bishan June, laakiin Koonfur Galbeed ayaa kahor timid waqtigaas, iyadoo dalbatay inuu qabsoomo kulan wixii ka dambeeya bisha July ee sanadkan 2020.

Koonfur Galbeed ma aysan sababeyn dib u dhigidda, iyadoo markii dambe ku dhawaaqday in aysan diyaar u ahayn ka qeybgalka shirka la qorsheeyay, taasoo keentay in gebi ahaanba fashilmo kulanka.

Galmudug oo muujisay xiiso ku saabsan in ay marti-geliso kulan madaxeedka ayaa soo jeedisay in la qabto 1-da Juulyo ee sanadkan aynu ku jirno ee 2020-ka.

Puntland, Galmudug iyo Jubaland waxay soo jeediyeen in la dhiso marka hore kalsoonida dhinacyada, oo marka hore lagu wadahadlo Internet-ka [ZOOM], laakiin waxaa isku dayga markale ku gacan-seyrtay Koonfur Galbeed.

Koonfur Galbeed, oo u janjeerta dhanka Villa Soomaaliya, ayaa diidmo kala hor-timid soojeedin kasta oo dhinacyada kale sameeyeen, oo lagu doonayay in afgarad laga gaaro khilaafka, lana qabto shirweynaha.

Dowladda Federaalka ayaa bishii May ka dalbatay UNSOM in uu casuumaad u fidiyo madaxda dowlad goboleedyada waddanka, si xal loogu helo khilaaf siyaasadeedka la degay dalka saddexdii sano ee xukunka Farmaajo.

GAROWE ONLINE