Dalabyada soo-celinta askarta ku maqan Eritrea oo korortay

MUQDISHO, Soomaaliya - Waalidiinta wiilashooda uu askareeyay maamulka Farmaajo ayaa maanta waxay mar kale banaanbax ka dhigeen isgoyska Lamber ee magaalada caasimada ah ee Muqdisho.

Iyada oo waalidiinta ay goobayaan wilashooda si qarsoodi ah tababarka loogu diray Eritrea, cutubyo kamid ah booliska Soomaaliya ayaa warbaahinta u diidaya in ay kasoo waramaan mudaaharaadka.

Mudaharaadka ayaa imanaya maalmo kadib warbixinta xuquuqul insaanka Qaramada Midoobay ayaa lagu sheegay in askar Soomaaliya ka socotey ay wehliyeen ciidamada Eritrea ee ka dagaalameen Tigray.

Dowladda waqtigeedu dhammaaday ee Soomaaliya ayaa waxay dhowr jeer beenisay sheegashooyinka ah in ciidamada Soomaaliya ay ku lug lahaayeen dagaalkii Tigray ee Itoobiya sanadkii hore.

Hase ahaatee, maamulka Farmaajo ayaa ku guuldareystay in uu soo bandhigo caddeymo xoojinaya sheegashadiisa, taas oo walaaca ku xoojisay waalidiinta oo sheegay in muddo aysan la hadlin wiilashooda.

Idaacadda VOA-da laanteeda afka Soomaaliga ayaa dhowaan waxay baahisay in askarta qaarkood ay wajahayaan xaalad adag oo dhanka nolosha ah isla markaana uu tababarka u dhamaadey bishii sagaalaad.

Nidaamka lagu qoray askarta Soomaalida ah ee tababarka loogu qaadey Eritrea ayaa ahaa mid kaliya ku koobnaa xafiiska madaxweynaha waqtiga k dhacay iyo hay'adda NISA mana la marsiin hay'addaha kale.

GAROWE ONLINE