Koonfur Galbeed: Mas'uul hoygiisa lagala baxay oo la dilay
-
WARIYAHA MUQDISHO GAROWE ONLINE
- Posted On 23-12-2021, 04:52PM
BAYDHABO, Koonfur Galbeed - Dabley loo maleynayo dagaalameyaasha Al-Shabaab ayaa afduubtey kadibna dilay Manuur Sheekh Yuusuf, guddoomiyihii maxkamada degmada Buurhakaba ee gobolka Baay.
Sida ay muujinayaan warbixinada laga helay dadka degaanka, marxuumka ayaa habeenimadii Arbacadda lagala baxay hoygiisa waxaana meydkiisa laga helay subaxdii duleedka magaaladda.
Saraakiil dhanka ammaanka ah ayaa u sheegay Garowe Online in ay baaritaan ku bilaabeen dhacdadan ayna soo bandhigi doonan natiijadda baaritaanka oo gabagabadiisa aysan waqti u qaban.
Maleyshiyaadka gacansaarka la leh ururka argagixisadda ah ee Al-Qaacida ayaa dusha saartey mas'uuliyadda falkan, sida ay baahisay warbaahinta ku hadasha afkooda oo adeegsaneysa baraha internet-ka.
"Geerida Manuur waxay saameysay qof kasta oo kamid ah dadka ku dhaqan Buurhakaba maadaama uu ahaa mid si weyn looga yaqaano degaanka oo idil," ayuu yiri qof kamid ah dadka degaanka.
Illaa haatan, lama ogga haddii ay jiraan howlgallo ay ciidamadda amniga u sameeyeen sidii ay gacanta ugu soo dhigi lahaayeen. Laamaha ammaanka waxay ka gaabsadeen in ay ka warbixiyaan dhacdadan.
Buurhakaba oo 181 KM u jirta caasimadda Soomaaliya ee Muqdisho marka la adeegsanayo wadada magaalada Baydhabo ayaa caan ku ah buuro badan waana sababta loogu yaqaano magaca ay hadda leedahay.
GAROWE ONLINE
