Maamulka Gedo oo ka warbixiyay Diyaarad ku dhacday Garabahaarey
-
- Posted On 03-06-2017, 05:36PM
GARBAHAREY, Somalia- Maamulka gobolka Gedo ayaa fahfaahin ka bixiyay Diyaaradii maanta ku dhacday Garoonka Diyaaradaha magaalada Garbahaarey, taasi oo u rarneyd Hay’adda WFP.
Cismaan Nuux Xaaji, oo ah ku xigeenka Gudoomiyaha Gedo ayaa sheegay in Diyaarada ay soo wajahday Cilad farsamo, kadib ay garabka ku dhufatay dhowr Guri oo ka dhaw Garoonka, kahor inta aysan dhicin.
“Diyaarad weyn oo ciladaysan ayaa maanta kusoo dhacday Garoonka degmada. Diyaarada waxay ahayd mid ciladaysan, oo soo dagi waysay, waxayna garabka kusoo dhufatay dhor darbi, kadibna dab ayaa ka qabsaday,” Ayuu yiri Cismaan.
Wuxuu sheegay in Diyaarada ay u rarnayd Hay’dda WFP, waxanya cunto gargaar ah iyo waxtaabaha lagu nafaqeeyo caruurta u siday Dadka Barakaciyaasha magaalada Garbahaarey iyo Deegaanada ku dhaw.
Waxay Diyaarada ka timid dhanka Degmada Doolow, oo ay Sahayda Gargaarka kasoo qaadey, waxaana ay Saraakiisha sheegeen in la badbadiyay dhamaan shaqaalihii saarnaa, inkastoo Duuliyaha uu dhaawacmay.
Saraakiisha Garbahaarey waxay sheegeen in la demiyay dabkii ka kacay Diyaaradda, Islamarkaana Duulimaadka Garoonka uu caadi kusoo laabtey.
Waxay ahayd Todobaadkii lasoo dhaafay markii ay Diyaarada ay leedahay Shirkada dhanka amaanka ee Bancroft ay ku dhacday Garoonka Muqdishu, kadib markii ay u bixi waayeen Lugaha xilliga dagitaanka.
GAROWEONLINE
