Madaxda DF oo lagu eedeeyay in ay ku lug-leeyihiin khilaafka labada Aqal

MUQDISHO, Soomaaliya - Madasha Xisbiyadda Qaran oo taageertay falcelintii Aqalka Sarre ee xeerarka doorashooyinka ayaa sheegtay in madaxda dowladda federaalka Soomaaliya ay "ku lug-leeyihiin khilaafka guddoonka labadal Aqal".

Senate-ka Soomaaliya oo 24-kii bishaan June shaaciyey in la bedelay nuquladii saxda ahaa ee afarta xeer doorasho ee loo qaybiyey Golaha Shacabka ayaa ka digay dhibaato ka dhalan karta "hadii qaabkaas lagu meelmariyo xeerarkaas".

War-saxaafadeed kasoo baxay Madasha Xisbiyada Qaran ayaa ku dhaliilay hogaanka dowlada federaalka in ay ku guuldareysteen in ay caddeeyaan hadii doorashooyinka loo qorsheeyay 2020-21 ay waqtigooda ku dhacayaan.

Sidda laga soo xigtay bayaanka oo uu arkay warsidaha Garowe Online, "waxaa muuqanaya ifafaale tilmaamaya" in madaxda ay lug ku leeyihiin khilaafka gudoonka labada Aqal ee ku saabsan xeerarkan muhiimka u ah coddeynta soo aadan.

"Ugu dambeyntii, madashu waxay u aragtaa in waxyaabaha dhacaya oo dhan ay tahay waqti lumis loogu gogol xaarayo muddo kororsiga xil-heynta hay'addaha dastuuriga ee dalka," ayaa la raaciyey qoraalka soo baxay Jimcada maanta ah.

Dib-u-dhac ku yimaadda doorashooyinka dalka oo muhiim u ah xasiloonida siyaasada, nabad-gelyada iyo kala dambeynta ayay ka dhawaajiyeen in ay ka digayaan.

Gunaanudkii, madaxa fadhisa Villa Soomaaliya ayay ugu baaqeen in uu joojiyaan cagajiidka iyo waqti lumiska isla markaana ka shaqeeyaan sidii heshiis mideysan looga gaari lahaa in aysan waqtigeeda dhaafin cod-bixinta shaki ku jiro ee 2020-21.

WAR-SAXAAFADEEDKA

GAROWE ONLINE