Madaxweynaha Somalia iyo Guddoomiyaha Midowga Africa oo Muqdishu ku kulmay
-
- Posted On 18-03-2017, 11:13AM
MUQDISHU, Somalia- Gudoomiyaha Ururka Midowga Africa Moussa Faki Mahamat iyo wafdi uu hogaaminayo ayaa Goor-dhow soo gaarey magaalada Muqdishu, ee Caasumadda dalka Somalia.
Madax sare oo uu kamid yahay Ra'iisul Wasaare Xasan Cali Kheyre ayaa Garoonka Diyaaradaha Aadan Cadde kusoo dhaweeyay Wafdigaas, waxaana loo galbiyay dhanka Villa Somalia.
Madaxweyne Maxamed Cabdullaahi Farmaajo, ayaa kusoo dhaweeyay xarunta dalka Somalia looga taliyo, waxaana dhexmaray kulan saddex geesood ah oo ay uga hadleen xaaladda Somalia.
Dhinacyadaas ayaa sidoo kale isla soo qaaday dhanka amniga iyo abaaraha baahsan ee ka jira waddanka, waxayna isla qaateen in la sameeyo gurmad deg deg ah.
Booqashada Moussa Faki Mahamat ee Caasumadda dalka Somalia, waa midii ugu horeysay tan iyo markii loo doortay Gudoomiyaha Midowga Africa Bishii January, ee 2017.
Amniga Muqdishu ayaa aad loo adkeeyay saaka kahor imaanshaha Moussa Faki, waxaana la xiray dhamaan waddooyinka, gaar ahaan mida isku xirta Garoonka Diyaaradaha iyo Villa Somalia.
GAROWEONLINE
