Madaxweyne Farmaajo oo markale Al Shabaab ugu baaqay dib u heshiisiin

MUQDISHU, Somalia - Madaxweynaha Somalia Maxamed Cabdullaahi Farmaajo, ayaa ku celiyay markale in dowladiisa ugu baaqayso Al shabaab inay ogolaadaan dib u heshiisiin, islamarkaana ay joojiyaan leynta shacabka.

"Waxaan leenahay Al shabaab kaalaya aan wadahadalno, oo hubka dhiga, waxaad u baahan tihiin diyaar baan u nahay, ee ogolaada marka hore dib u heshiisiin iyo inaad joojisaan dilka shacabka iyo burburinta hantidooda," ayuu yiri Madaxweyne Farmaajo.

Wuxuu sheegay Madaxweynaha in dowladdiisa doorteen shacabka, islamarkaana aysan ku imaan awood military, sidoo kalena ay albaabadeeda u furan yihiin inay la hadasho qof kasta oo mucaaradsan.

Isagoo hadalkiisa sii wata, ayaa waxa uu yiri: Kuwa ajbaniga ah ee dalkeena kusoo dhuumanaya, ee ka shaqeynaya inaysan shacabka Somalia helin Nabad iyo dowlad wanaagsan."

Madaxweynaha ayaa xusay in dowladda Federaalka ay diyaar u tahay inay la hadasho Al Shabaab si loo soo afjaro dhibaatooyinka daba-dheeraadey, ee ay wajahayaan Shacabka mudada ka badan 25-ka sano.

Madaxweyne Farmaajo ayaa markii la caleema saarey u fidiyay Al-Shabaab cafis mudo labo bilood ah, isagoo ugu baaqay dagaalamiyaasha kooxda in ay kusoo biiraan dowladda, kana qeyb noqdaan dib u dhiska dalkooda.

Al shabaab ayaan la ogeyn inay aqbali doonto baaqa Madaxweynaha, kaasi oo Madaxdii dowladihii ka horeeyay sidan oo kale u jeediyeen, islamarkaana ay Kooxdan xiriirka la leh Al Qaacida ka diiday.

GAROWEONLINE