Mareykanka oo Duqeyn kale u geestay Saldhig Al Shabaab

BALCAD, Soomaaliya - Taliska ciidamada Mareykanka ee Africa [AFRICOM], ayaa xaqiijiyay in Diyaaradahooda dagaalka ay duqeyn kale oo dhanka cirka ah ay ka geesteen saldhig Al Shabaab ku leedahay Koonfur Soomaaliya.

Duqeyntan ayaa xalay ka dhacday fariisan Al Shabaab oo ku yaalla deegaanka qiyaastii 7KM dhanka Bari uga beegan degmada Balcad ee gobolka Shabeellaha Dhexe, waxaana ka dhashay khasaarooyin kala duwan.

AFRICOM ayaa weerarkan ku tilmaantay mid is-difaacid ah, sidoo kalena looga hortagayay weerar Al Shabab ay qorsheynaysay inay ku qaado ciidamadooda iyo kuwa xulufada ay yihiin ee dowladda Federaalka iyo AMISOM.

Duqeyntan ayaa noqonaysa midii labaad oo mudo saddex maalmood gudahooda uu Mareykanka ka fuliyo koonfurta Soomaaliya, iyadoo kii ugu dambeeyay ay ka geesteen gobolka Baay, kaasi oo uu kudilay tiro katirsan Al Shabaab.

Gobollada Shabeelooyinka ayaa waxaa ka socda dhaq-dhaqaaq xooggan, oo ay wadaan ciidamada xoogga dalka iyo AMISOM kaasi oo hordhac u ah howlgal ay dowladda doonayso inay Al Shabaab uga sifeyso guud ahaan dalka.

Al Shabaab ayaa shalay la wareegtay Basra oo ku yaalla inta u dhaxaysa Afgooye iyo Balcad, kadib markii ay isaga soo baxeen Ciidamada dowladda iyo AMISOM.

GAROWE ONLINE