Mareykanka oo Farmaajo ku booriyey in uu la heshiiyo maamulada

MUQDISHO, Soomaaliya - Dowladda Mareykanka ayaa ugu baaqdey madaxda Soomaalida in ay deg deg xal uga gaaraan is-faham-waaga dhanka doorashooyinka 2020-21 xilli muddo xileedka madaxweynaha uu dhamaadey.

War qoraal ah oo lagu daabacay barta website-ka safaaradda Mareykanka ee Soomaaliya ayaa lagu sheegay in muhiim ay tahay in hogaanka Soomaalida ay qaataan "kaalin mas'uuliyadeed".

"Mareykanku wuxuu ku boorrinayaa Madaxweyne Farmaajo iyo hoggaanka qaran ee Soomaaliya inay hadda wax ka qabtaan jahwareerka siyaasadeed ee halista ku ah mustaqbalka Soomaaliya iyo in uu la heshiiyo madaxda dowlad goboleedyada xubnaha ka ah Federaalka si qaab si deg deg ah loogu qabto doorashooyinka baarlamaanka iyo madaxweynaha," ayaa lagu yiri qoraalka.

Bayaanka ayaa lagu caddeeyay in khilaafka jira uu wiiqi karo ololaha ka dhanka ah maleyshiyada Al-Shabaab ee Soomaaliya.

"Dhibaatada siyaasadeed ee sanadkii la soo dhaafay waxay dhalisay natiijo la'aan niyad jab leh oo la xiriirta la-dagaallanka Al-Shabaab iyo hagaajinta amniga, horumarinta horumarka dhaqaalaha ka dib markii la gaadhay marxaladda koowaad ee ka cafinta deynta, iyo in si wax ku ool ah wax looga qabto cunno yarida iyo aafooyinka dabiiciga ah ee halista ugu badan leh. dadka Soomaaliyeed," ayay ku dareen.

Sidda ku xusan war-saxaafadeedka, hogaamiyeyaasha waa in dantooda gaarka ah ay ka horumariyaan tan guud.

"In si deg deg ah loo xaliyo ismari waaga doorashada ayaa muhiim u ah mustaqbalka Soomaaliya," ayay xustay safaaradda.

Qoraalka ayaa lagu soo xiray: "Waa masuuliyada iyo waajibka saaran madaxda qaranka iyo kuwa gobolka inay meel iska dhigaan raadinta danaha siyaasadeed, taa badalkeedana ay ku shaqeeyaan danaha shacabka Soomaaliyeed oo iyagu ka mudan kan ugu fiican madaxdooda. Hadda waxaa la joogaa xilligii la xallin lahaa arrimaha taagan oo la dhammayn lahaa shaqada qabashada doorashooyinka".

Dhawaqa Mareykanka wuxuu imaanayaa saacado kadib markii Beesha Caalamka ay walaac ka muujisay burburka shirkii Dhuusamareeb soona dhaweysay dedaalada shir ay mar kale isugu yimaadaan dhamaan saamileyda siyaasadda.

GAROWE ONLINE