Mareykanka oo ka warbixiyey duqeymo uu ka fuliyey Soomaaliya

MUQDISHO, Soomaaliya – Milatariga Mareykanka ayaa xaqiijiyey in Axadii, 29-ka December, 2019, uu saddex duqeyn ka fuliyey koonfurta Soomaaliya.

Laba kamid ah duqeymaha oo laga soo wariyey degaanka Kuunya Barow ayaa lagu khaarijiyey afar dagaalame, waxaana lagu burburiyey laba gaari.

Sidoo kale, duqeynta saddexaad oo laga fuliyey tuulada Cali Barow ayaa lagu naf-gooyey laba kamid ah maleeshiyaadka xiriirka la leh Al-Qaaicda.

Labada goobood ee duqeymaha ay ka dhaceen ayaa hoostaga gobolka Shabeellaha Hosoe ee ka tirsan maamul goboleedka Koonfur Galbeed.

Dowladda Federaalka Soomaaliya ayaa horey u shaacisay in duqeymahaan xubnaha lagu khaarijiyey ay kamid yihiin "horjoogeyaal sarre".

Dhinaca kale, Al-Shabaab wali kama jawaabin sheegashada howlgaladan ay si wadajir ah u fuliyeen Dowladda Soomaaliya iyo Mareykanka.

Duqeymahaan ayaa u muuqanaya kuwa looga jawaabayey qaraxii Ex-kontarool Afgooye ee lagu dilay ku dhowaad 100 ruux oo arday Jaamacadeed u badnaa.

GAROWE ONLINE