Maxuu MD hore Farmaajo ka damacsan yahay Shirka Garoowe?
-
Garowe Online
- Posted On 09-02-2021, 08:30PM
MUQDISHO, Soomaaliya - Madaxweynaha waqtigiisu dhamaaday Maxamed C/llaahi Farmaajo ayaa shir ku saabsan doorashooyinka isugu yeeray Madaxda Dawlad Goboleedyada iyo Gobolka Banaadir 15-ka bishan.
Shirkan oo la qorsheeyay inuu ka dhaco magaaladda Garoowe, ee Caasimadda dawladda Puntland, ayaa Madaxweynihii hore Farmaajo ku baaqey xili mudo-xileedkiisa dastuuriga uu dhamaadey Isniintii Feb 8.
Farmaajo ayaa diiday heshiis in la gaaro, iyadoo labo maalmood ay uga harsan tahay waqtigiisa ayuu kasoo tagey Shirkii Dhuusamareeb oo ahaa rajadii ugu dambeysay ee xalka khilaafka doorashooyinka.
Shirkii Dhuusamareeb Farmaajo wuxuu ku lumiyay fursad wayn oo ahayd in lagu gaaro heshiis siyaaaseed oo doorashadda la xiriira kaasoo inta fulintiisa lagu guda jiro uu heli lahaa mudo-kordhin farsamo [Technical Extension], oo Madaxweyne sharciyad haysta kusii ahaan lahaa.
Su’aasha waxay tahay fursadii uu Farmaajo isagoo Madaxweyne ah lumiyay, ma ku heli doonaan Shirka Garoowe isagoo aan Madaxweyne ahayn, oo waqtigiisa dastuurka uu siiyay ka dhamaaday maalin kahor.
Warsidaha Garowe Online ayaa ogaadey in Madaxtooyadda Villa Soomaaliya ay ku baaqday Shirka iyadoo aan jirin wadatashiyo fiican oo Farmaajo la yeeshay Madaxda Dawlad Goboleedyada shanta ah.
Dhowr ujeedo ayuu Farmaajo ka damacsan yahay Shirka Garoowe, kuwaasoo ay kamid yihiin:
1 – Inuu isaga leexiyo eedeymo loogu soo jeediyo Shirka Gollaha Amniga QM ee arrimaha Soomaaliya oo berri go’aano laga soo saarayo, maadaama ku fashilmay inuu doorashadda waqtigeeda ku qabto.
2 – Inuu ku muujiyo in wali uu Madaxweyne dalka ka yahay, oo soo dhawayn lamid ah kuwii hore loogu sameeyo Puntland.
3 – Inuu Madaxda Maamullada ka dhameysto mudo-kordhin uu Mursal lawado, oo dhawaan la rabey in Gollaha Shacabka ku dhawaaqo, balse dib loo dhigay markii Xildhibaanada mucaaradka fashiliyeen.
Farmaajo hadda ma lahan awood uu shir isagu yeero, maadaama meesha ka baxday xasaanadii iyo awoodii uu lahaa, waxa kaliya dalka ka qabsoomi karo xiligan waa shirweyne Beesha Caalamka ku baaqday, oo kawada qeyb galayaan saamileyda Siyaasadda Soomaaliya.
GAROWE ONLINE
