Milatariga Soomaaliya oo qabsadey dhul muhiim u ahaa kooxda AS

Howlgalka oo dhacay xilli hore oo Khamiista maanta ah ayaan la ogeyn khasaaraha ka dhashay.

MUQDISHO, Soomaaliya - Ciidamada dowladda Soomaaliya iyo kuwa deegaanka ayaa dib ula wareegay deegaano muhiim ah oo ka tirsan gobolka Hiiraan, sida ay sheegeen saraakiisha.

Saraakiisha ayaa sheegay in ciidamada dowladda Soomaaliya iyo kuwa deegaanka oo is garabsanaya ay la wareegeen gacan ku heynta Buurweyn iyo Shaw oo fariisimo waaweyn ku leh galbeedka Hiiraan. Howlgalka ayaan la ogeyn khasaaraha ka dhashay.

Nuur Maxamed Absuge oo ah guddoomiyaha degmada Jalalaqsi ayaa warbaahinta Qaranka u xaqiijiyay in ciidamada dowladda iyo kuwa deegaanka ay si buuxda ula wareegeen gacan ku heynta Buurweyn iyo Shaw.

Guulahan ayaa imaanaya iyadoo ay socdaan dadaallo ballaaran oo ay wadaan ciidamada dowladda Soomaaliya iyo kuwa gobolka si loo burburiyo joogitaanka Al-Shabaab.

Dhowaan ayay aheyd markii ciidamada dowladda Soomaaliya iyo kuwa dowlad goboleedka Jubbaland ay la wareegeen deegaano dhowr ah oo ka tirsan Jubbada Hoose oo ay ka mid yihiin Lagta Qubbi iyo Golhadamo, kuwaasi oo qeyb ka ah howlgallada lagu nadiifinayo wadada isku xirta Kismaayo iyo Afmadow.

Qabsashada Buurweyn iyo Shaw ayaa la filayaa inay si weyn u wiiqdo awoodda Al-Shabaab ee galbeedka Hiiraan. Howlgalka ayaa daba socday weerar qasaaro geystay oo habeen hore Al-Shabaab ay ku qaadeen degmada Jalalaqsi. Al-Shabaab waxay maamulayeen Buurweyn iyo Shaw in ka badan toban sano.

GAROWE ONLINE