Musharaxiinta oo dalbadey in loo ogolaado warbaahinta qaranka

Hadal kasoo yeeray guddoomiyaha gobolka Banaadir ayay sidoo kale aad u cambaareeyeen.

MUQDISHO, Soomaaliya - Golaha Midowga Musharaxiinta ayaa soo dhaweeyay dib-u-dhigista banaanbaxii looga soo horjeeday maamulka Farmaajo ee la qorsheeyay in uu Khamiis, 13-ka Janaayo, ka dhaco Muqdisho.

War-saxaafadeed kasoo baxay midowga laguna faafiyey baraha bulshadda ayaa sidoo kale waxaa lagu cambaareeyay hadal kasoo yeeray guddoomiyaha gobolka Banaadir ahna duqa caasimada, Cumar Filish.

Filish oo ka hadlay madal uu maamulkiisa soo qabanqaaniyey ayaa mudaaharaadka wuxuu ku tilmaamay "fal-dambiyeed" halka midowga musharaxiinta uu ku sifeeyay "xaq dastuuri ah".

"Goluhu wuxuu adkeynayaa in mudaaharaadka uu yahay xaq dastuuri ah, shacabka gobolka Banaadirna ay mudaaharaadi karaan xilli kasta," ayaa lagu yiri nuqul kamid ah bayaankan uu arkay Garowe Online.

Xukuumadda xilgaarsiinta ah ee Rooble ayay uga mahadceliyeen "in ay gudatay waajibaadkii ka saarnaa mudaaharaadka" ka gedaal markii ay aqbashay in ay sugto ammaanka isu-soo-baxan.

"Goluhu wuxuu mar kale adkeynayaa in ay ilaaliso xuquuqda muwaadinka xilna iska saarto furitaanka saaxada siyaasadda, kulamada golaha, safarka iyo in warbaahinta qaranka loo ogolaado musharaxiinta," ayay xuseen.

Warbaahinta qaranka waxaa haatan si buuxda gacanta ugu haya xukuumadda Rooble taasoo mararka qaar iska indha-tirta macluumaadyadda ama fariimaha ololaha Farmaajo sababo la xiriira khilaafka kala dhaxeeya.

HOOS KA AKHRISO QORAALKA MUSHARAXIINTA

GAROWE ONLINE