Shirqool "loo maleegayo doorashooyinka" oo laga digay

Musharaxiinta ayaa sheegay in Farmaajo iyo Fahad ay ku howlan yihiin qorshahan oo halis ku dalka.

MUQDISHO, Soomaaliya - Golaha Midowga Murashaxiinta ayaa dalbadey in la dedejiyo doorashooyinka ayna hawshaas ku garab taagan yihiin ra'iisul wasaaraha xilgaarsiinta iyo Golaha Wadatashiga Qaran.

Qoraal ayay ku sheegeen in ay ugu baaqayaan Rooble "in uusan gorgortan ka gelin heshiiskii 27 Maajo ee loogu igmaday gacan ku haynta amniga iyo daadihinta doorashooyinka dalka".

Ciidamadda ayay hoosta ka xariiqeen in muhiim ay tahay in aysan ku milmin siyaasadda "kana hortagaan cid kasta oo isku dayda in ay carqaladeyn ku sameyso doorashooyinka".

Beesha Caalamka iyo golaha wadatashiga qaranka ayay ku waaniyeen in ay ka gacan ka geystaan sidii deg-deg loogu dareeri lahaa doorasho "tilmaamaanna shaqsiyaadka qas-wadayaasha ah".

"Waxaan indhaha ku haynaa dhaqdhaqaaqa ciidan iyo shirqoolka ay maleegayaan madaxweynaha muddo xileedkiisu dhamaadey iyo taliyihii hore ee NISA si ay u carqaladeeyaan doorashooyinka una abuuraan xasilooni darro iyo qalqal amni," ayay ku dareen.

Farmaajo iyo Fahad ayay hoosta ka xariiqeen in aysa ka yeeli doonin in ay carqaladeeyaan doorashooyinka waxaana ay ku tartarsiiyeen in ay ka fogaadaan talaabooyinka ay haatan ku fekerayaan.

Ugu dambeyntii, cadaalad u helida kiiska Ikraan Tahliil Faarax ayay tibaaxeen in ay mar walba u taagan yihiin. Xeer-ilaalinta ayay ku booriyeen in ay shacabka lasoo wadaagaan cid kasta oo carqalad u ah baarista.

Hoos ka akhriso qoraalka musharaxiinta

GAROWE ONLINE