UN-ka oo soo dhaweeyay shirkii madaxda DF iyo maamulada

MUQDISHO, Soomaaliya – Howlgalka Qaramada Midoobay ee Soomaaliya ayaa soo dhaweeyay kulankii maanta khadka Internet-ka ku dhexmaray madaxda dowladda federaalka ah iyo maamuladda wadanka.

Qoraal lasoo dhigay barta Twitter-ka ee UNSOM ayaa lagu muujiyey taageeradooda wadahadalka oo horudhac u ah kulan fool ka fool ah oo la qorsheynayo in madaxdu yeeshaan.

"Howlgalka Qaramada Midoobay ee Soomaaliya wuxuu soo dhaweynayaan kulankii muuqaalka ahaa ee maanta dhexmaray hogaamiyeyaasha dowladda federaalka iyo dowladaha xubinta ka ah," ayaa lagu yiri qoraalka.

Warka qoraalka ah ayaa waxaa la raaciyey: "Waxaan ku bogaadineynaa madaxweyne Farmaajo iyo hogaamiyeyaasha dowladaha xubinta ka ah federaalka talaabadan muhiimka u ah wada-xaajoodyadda joogtada ah ee saamileyda Soomaaliya ka yeeshaan qadiyadaha hor-tabinta u leh qaranka; doorashooyinka, ammaanka iyo deyn cafinta".

Shirkii Maanta, oo madaxda ay ku yeesheen aaladda Whatsapp’-ka, ayaa gogol-xaar u ah kulan kale oo fool-ka-fool ah, kaasoo goobta lagu qabanayo iyo waqtiga uu shaacin doono madaxweyne Farmaajo.

Xog hoose oo Garowe Online helay ayaa sheegay in kulankii maanta ay qeybgaleen Ra’iisalWasaare Xasan Cali Khayre, Madaxweyneyeyaasha Puntland, Hirshabeelle, Jubbaland, Galmudug, Koonfur Galbeed iyo Guddoomiyaha Gobolka Banaadir.

Madaxda Maamullada ayaa dalbadey in la joojiyo sharciyada horyaalla baarlamaanka inta ay xal laga gaarayo, oo kulamo ka yeelanayaan madaxda oo muddo dhowr sano ah uu khilaaf ka dhaxeeyo.

Soomaaliya ayaa gashay mar-xalad kala guur ah oo isha ku hayo caalamka qaabka ay madaxda u maareeyaan isla markaana u dhacdo doorashooyinka 2020-2021 xilli ay ka digeen dib u dhac iyo muddo kororsi.

GAROWE ONLINE