Qarax khasaaro geestay oo ka dhacay Muqdisho

MUQDISHO, Soomaaliya - Hal Askari ayaa ku dhintay, qaar kalena way ku dhaawacmeen qarax saaka oo Arbaco ah ka dhacay magaalada Muqdisho, ee Caasimadda Soomaaliya.

Sida Goob-jooge uu u sheegay Warsidaha Garowe Online, qaraxa oo ahaa miino ayaa lala eegtay ciidamada katirsan kuwa howlgalka xasilinta xilli ay marayeen Isgiyska Tarabuunka ee degmada Hodon.

Kooxda Al Shabaab ayaa sheegtay mas'uuliyadda qaraxa, iyadoo ku faantay in saddex Askar ay ku dishay, inkastoo warkaasi ay Saraakiisha amniga degmada ay beeniyeen.

Qaraxa ayaa saameyn ku yeeshay isku socodkii gaadiidka iyoo dadweynaha, iyadoo ciidamada ay xireen wadada mudo daqiiqado ah, iyagoo meesha ka qaadey Askari dhintay meydkiisa iyo kuwa kale ee dhaawacmay.

GAROWE ONLINE