Rooble oo amar dul-dhigay wasiirada xukuumada xilgaarsiinta

Rooble ayaa wasiiradiisa uga warbixiyay heshiiskii Golaha Wadatashiga Qaran ee dhammeystirka doorashooyinka.

MUQDISHO, Soomaaliya - Ra’iisul Wasaaraha xilgaarsiita Maxamed Xuseen Rooble ayaa Khamiista maanta ah wuxuu guddoomiyay Shirka Toddobaadlaha ah ee Golaha Wasiirrada.

Sida lagu sheegay qoraal kasoo baxay xafiiskiisa, Rooble ayaa xubnaha golaha wuxuu uga warbixiyay heshiiskii Golaha Wadatashiga Qaran ee dhammeystirka doorashooyinka

Wasiirka koowaad ee laanta fulinta ayaa sheegay in xukuumadda iyo dhammaan dhinacyada ay ka go’an tahay in ay doorashadu ku dhammaato xilligii lagu heshiiyay.

Isagoo ka hadlayay amniga dalka, ayuu Rooble faray hay’adaha amnigu in ay xoogga saaraan sugidda ammaanka dalka, isagoo faray laamaha amnigu in aysan ku milmin siyaasadda, xooggoodana isugu geeyaan la dagaallanka argagixisada oo ah cadowga ugu weyn ee dalkeenna hortaagan.

Rooble ayaa tibaaxay in xukuumaddiisu ay ku dhaqmeyso siyaasad arrimo dibadeed oo ku saleysan halka ay ku jirto maslaxadda Ummadda Soomaaliyeed,

Bayaanka ayaa lagu caddeeyay in Maxamed Xuseen Rooble uu "tilmaamay in aysan suurto gal ahayn in Soomaaliya ay colaadiso dalal ay kala dhexeeyaan dano badan".

Ugu dambeyn, Ra’iisul Wasaaraha ayaa wuxuu ku amray wasiirrada iyo madaxda kale ee hay’adaha xukuumaddu in aysan ku tagri falin awoodda iyo hantida qaranka xilligan kala guurka ah.

GAROWE ONLINE