RW Khayre oo magacaabay Wasiirka Gaashaandhigga

MUQDISHO, Soomaaliya - Ra'iisul Wasaare Xasan Cali Khayre ayaa Safiirkii hore ee Turkiga Maxamed Mursal Sheekh Cabdiraxmaan u magacaabey xilka Wasiirka Gaashaandhigga Soomaaliya.

Wasiirka Warfaafinta Xukuumadda Cabdiraxmaan Yariisow ayaa xaqiijiyay magacaabista Wasiirka Gaashaandhigga cusub.

Ra'iisul Wasaaraha ayaa Mudane Mohamed Mursal Sheikh Abdirahman u magacaabay Wasiirka Gaashaandhiga

— Abdirahman O. Osman (@engyarisow) November 26, 2017

Maxamed Mursal Sheekh Cabdiraxmaan, oo horey usoo noqday Safiirkii ugu horeeyay ee Soomaaliya u fadhiya Turkiga tan iyo wixii ka dambeeyay burburkii dalka, intii u dhaxaysay 2011-2015 ayuuna soo hayay jagadaasi.

Xukuumaddii Ra'iisul Wasaare Cumar Cabdirashiid, waxa uu kasoo noqday Wasiirka Biyaha iyo Tamarta, kadib markii laga qaadey xilka Safiirnimo.

Waxa uu Maxamed Mursal bedelayaa Cabdirashiid Cabdullaahi Maxamed oo xilkan iska casilay bishii October.

Dhanka kale, Ra'iisul Wasaare Khayre ayaa xilka ka qaadey Wasiirka Diinta & Awqaafta Iimaan Cabdullahi Cali, mana la oga sababta xilka qaadistiisa ka dambayso.

Xilka laga qaadey Wasiir Iimaan waxaa sii heynaya Wasiiru Dowlaha Cabdihakiin Xasan Ibraahim Ashkir.

GAROWE ONLINE