Sheekh caan ah oo lagu dilay duleedka Muqdisho [Fahfaahin]
-
Wariyaha Muqdisho GAROWE ONLINE
- Posted On 13-07-2018, 02:10PM
MUQDISHO, Soomaaliya - Dabley hubaysan, oo heebtooda la aqoonsan wali, ayaa maanta oo Jimco ah Sheekh caan ah ku dilay duleedka Muqdisho, ee caasimadda dalka Soomaaliya.
Magaalada ayaa mudooyinkii dambe martigelinaysay dilal khaarijin ah, oo ka dhan ah Odayaasha dhaqanka, Askarta dowladda iyo dadka kale ee hay'adaha la shaqeeya.
Marxuumka oo lagu magacaabi jiray Cabdullaahi Sheekh Maxamed Rooble ayaa lagu dilay inta u dhaxeysa Tabeelaha Sheekh Ibraahim iyo Tareedisho, oo ku yaalla duleedka magaalada Muqdisho.
Saddex dhalinyaro ah, oo bastoolado ku hubaysan, islamarkaana saarnaa Mooto ayaa jidka u galay Sheekha xilli uu watay Gaari nooca raaxadda ah ee loo yaqaano "NOAH", kadibna isla goobta ku dilay, halkaasi oo markii dambe meydkiisa laga soo qaadey.
Sheekh Cabdullaahi oo 85 jir ah, ayaa caan ku ahaa fidinta diinta Islaamka, isagoo ku tirsanaa dariiqada qaadiriyadda, waxaana uu kasoo jeedaa degaan ahaan degmada Bardaalle ee gobolka Baay, halkaasoo lagu wado in Meydkiisa lagu aaso.
Wali ma jirto cid sheegatay mas'uuliyadda dilka Allah ha u naxariistee Sheekh Cabdullaahi, mana la oga sababta loo beegsaday, balse waxaa xusid mudan in dilalka noocan ah lagu yaqaano inay geystaan Kooxaha Al-Shabaab iyo Daacish.
GAROWE ONLINE
